GENERAL SANTOS CITY – Nagkaaregluhay ang pamilya sa angkas sa motorsiklo nga namatay ug tag-iya sa boomtruck, human ang natigayong banggaanay sa duha ka sakyanan miaging gabii sa Fil-Am Road, Brgy Fatima ning dakbayan, kaniadtong Martes sa gabii.
Nagkasabot ang duha ka kampo nga mutabang ang tag-iya sa truck ang mga galastuhon sa pamilya sa namatayan. Kahinumduman nga ang namatay nga angkas sa motorsiklo mao si Mark Aballe nga mag-24-anyos na unta sunod semana, samtang ang driver mao si Ben Rey Flores.
Sa imbestigasyon sa Traffic Management Unit, anaa nga magkasugat nga lane ang duha ka sakyanan kung asa padulong sa airport ang direksyon sa boomtruck nga maneho ni Norvel Mario.
Miliko pasulod sa Prk Masigasig ang truck ug timing usab nga miagi ang motorsiklo hinungdan nga napasok ilawom sa truck ang motorsiklo ug si Flores ug nakaangkon ug bali-bali sa lawas, samtang si Aballe ang nalagpot nga maoy hinungdan sa iyang hinanaling kamatayon.
Sa karon padayong nagpatambal ug gina-obserbahan sa ospital si Flores gumikan sa naangkon nga mga bali sa lawas.
Nasayran nga gikan sa birthday party ang duha ka sakay sa motorsiklo, ug nakainom.
Wala usab matud pay lisensya ang driver niini, ug paso na ang rehistro sa motorsiklo.
