GENERAL SANTOS CITY – Padayon karon sa pagpangalap ug dugang impormasyon ang Polomolok Municipal Police Station may kalabutan sa pagpusil-patay sa usa ka retiradong magtutudlo ug kanhing barangay captain sa Polomolok, South Cotabato nga nahitabo miaging Biyernes.
Sa nagpadayong imbestigasyon sa kapulisan, gikabutyag nga posibleng may kalabutan ang nahitabong krimen sa sunud-sunod nga mga raid nga gipahigayon sa Polomolok ug posibleng nasaypan matud pa nga tipster sa mga pulis ang biktima nga si Ulama Nilong, hinungdan nga gipusil-patay.
Posible usab matud pang may kalabutan kini sa sunud-sunod nga pagkasikop sa mga miyembro sa Al Khilafa Philippines sa lugar, nga buot marekonisa sa ISIS.
Kahinumduman nga sakay sa sikad ang biktima ug pauli na unta gikan sa nagsambayang dihang gipusil sa riding in tandem nga suspects, nga sakay sa motorsiklo nga walay plaka.
