GENERAL SANTOS CITY – Padayong ginagukod sa mga militar ang mga rebelde sa mga kabukiran, partikular na sa Sitio Mahayag, Upper Suyan, Malapatan, Sarangani Province.
Kini human napatay ang usa ka rebelde human ang natigayon nga engkwentro kaniadtong Oktobre 5, Biyernes sa gabii, tali sa mga sakop sa 73rd IB Philippine Army ug NPA.
Sa pakighinabim sa Bombo Radyo kang SPO3 Kenneth Reyes sa Malapatan Municipal Police Station, giila niini ang napatay nga rebelde nga si Jimmy Ambat, nga miyembro sa Guerilla Front 71 Far South Mindanao Regional Command New Peoples Army ilawom sa pagdumala ni Alias Ka Bagyo.
Gibanabanaang anaa sa lima ka rebelde ang naka-engkwentro sa mga tropa sa gobyerno, nga misangko sa pagkamatay sa nahisgutang NPA member.
Hinuon, walay natala nga casualty sa bahin sa militar.
