GENERAL SANTOS CITY – Hangtod alas-12:00 na lang usab sa tungang gabii mamahimong able ang mga establisyimento sa tibuok siyudad.
Gumikan kini sa gipatuman nga curfew sa lokal nga panggamhanan, dungan sa mas gipahugtan nga pagpatuman sa seguridad, human ang natigayong IED explosion kaniadtong Setyembre 16 kung asa walo ang nasamdan, kung asa gitaas ang alerto sa alert level 4.
Hinungdan nga may nakapaskil na sa mga establisyimento nga sirado na sila sugod alas-12:00 sa tungang gabii hangtod alas-4:00 sa kaadlawon.
Kahibaluan nga gisugdan na sa kapulisan ang pagtuyok sa mga internet cafe, fastfood chain, ug mga balay-kalingawan, ug ang mga tawo nga maabtan sulod sa nahisgutang establisyimento atul sa curfew hours ang imbitahan sa presinto.
Samtang nagpadayon usab ang gipatuman nga No ID No Entry Policy sa mga checkpoint sa dakbayan.
Padayon usab ang pagparolya sa kapulisan ug kadtong mga madakpan hilabi na kadtong mga minors ang dad-on sa presinto ug ipalukat sa ilang mga ginikanan.
Samtang kadtong mga anaa na sa hustong edad ang kinahanglang makapakita ug identification papers aron i-release.
