ARAKAN, COTABATO – Mibalibad una ang 4th ID Philippine Army nga panganlan ang duha nila ka kaubanan nga namatay sa pagkahulog sa kimba sa dumptruck sa Meocan, Arakan, Cotabato.
Matud pa kang 1Lt. Tere Ingente, tigpamaba sa 4th ID Philippine Army, dead on the spot ang usa samtang ang laing usa ang dead on arrival sa ospital sa Kidapawan City.
Wala una niini gibutyag ang pangalan sa duha ka biktima gumikan pahibaluon pa ang pamilya sa mga nasampit. Gikabutyag nga gikan ang dumptruck sa Libertad, Arakan padulong sa Poblacion.
Sumala pa nga gamay ang dalan sa maong lugar kung asa gilikayan niini ang nakasugat nga motor, apan nahagbong hinuon sa kimba nga maoy hinungdan sa kamatayon.
Gawas sa duha, angol usab ang laing tulo nila ka kauban nga sakay usab sa nahisgutang truck, ug pulos anaa na sa maayong kahimtang samtang nagpabilin sa balay-tambalanan.
