GENERAL SANTOS CITY – Back to normal ug regular programming ang Bombo Radyo Gensan human makagawas gikan sa NBI detention cell ang station manager nga si Bombo Janjan Macailing ug news director nga si Bombo Boi Galano kagahapong adlawa.
Kini human nagbayad ug piyansa sa korte. Mapasalamaton si Bombo Janjan sa tanan nga padayong gasuporta ug nagsalig kaniya ug sa Bombo Radyo.
Gipasalamatan usab niini ang pamunuan sa Bombo Radyo Philippines, sa chairman, si Dr. Rogelio Florete, ug sa CEO nga si Ms. Margareth Ruth Florete, apil na sa area manager for Mindanao nga si Bombo Ricky Collado ug ubang mga opisyal sa network.
Dungan niini, gihingusgan ni Bombo Janjan nga set up ang nahitabo. Gihagit usab ni Macailing si Joel Apoliario, founder sa KAPA (Kabus Padatoon) nga ipagawas ang video nga nagpakita nga gidawat niini ang backpack o paperbag nga may unod matud pa nga P5 milyon base sa alegasyon.
Padayong ginabarugan sa Bombo Radyo nga iligal ang KAPA nga gadawatan ug investment gikan sa ilang mga miyembro pinaagi sa donation.
