GENERAL SANTOS CITY – Subling nagpahimangno ang mga otoridad ngadto sa mga motorista nga dili gayud magmaneho nga hubog.
Kini human nga laing motorista na usab ang nakabsan sa kinabuhi gumikan sa pagmaneho nga lango sa ilimnun.
Kahibaluan nga gideklarang dead on arrival sa balay-tambalanan ang nagpangalan ug Alvin Gatan, technician sa usa ka mall ning siyudad, taga-Ginoo Subd. Brgy Lagao, human matud pa mibangga sa pader kagahapon sa kaadlawon samtang nagmaneho ug motorsiklo nga hinulam lamang niya.
Base sa report, una na matud pa kining natumba samtang gamaneho gumikan sa kahubog, apan nakabarog ug pagpadayon sa pagsubay sa dalan.
Apan pag-abot sa Capareda St. sa Brgy Lagao, mibangga matud pa siya sa pader, kung asa nakaangkon siya ug grabeng samad sa ulo, hinungdan nga gideklarang dead on arrival sa balay-tambalanan.
Ug gani, dili makatuo ang pamilya niini sa nadangatan sa ilang mahal sa kinabuhi, nga gumikan sa pagmaneho nga lango sa ilimnun, nga supak sa balaod.
