GENERAL SANTOS CITY – Daghan ang nagmaya nga mga residente sa dakbayan ug kasikbit lugar human sa anunsyo nga mag-able na ang Mindanao State University -GenSan Campus ug College of Medicine.
Daghan sa mga netizens ug mga tigpaminaw sa sibyahanan ang nagpadayag sa ilang pagmaya ug pagpasalamat gumikan sa naasoy’ng maayong balita.
May mga estudyante nga nagpadayag nga interesado nga mutungha ug mukuha sa naasoy’ng kurso, apil na ang pipila ka mga ginikanan nga may mga anak nga gatungha pa sa high school ug pangandoy nga magdoktor ang ilang anak, gumikan dili na kinahanglang muadto sa layo nga lugar aron mukuha ug kursong Medicine.
Kahibaluan nga sa pakighinabi sa Bombo Radyo, gibutyag ni Dr. Marilyn “Mimi” Abiera, Vice Chancellor sa MSU-Gensan nga target nila nga magsugod ang operasyon sa ilang College of Medicine sa tuig 2020, nga mahimutang sa MSU-High School Campus.
Gikabutyag nga nahuman na ang soil analysis sa pagpatukod sa building kung asa sa bulan sa Setyembre o Oktobre gilaumang matigayon ang ground breaking ceremony.
Sumala pa nga ang building ang usa sa mga rekositos una nga ablihan ang MSU College of Medicine, lakip na ang feasibility study nga usa sa ilang ginahimo karon.
Aduna na usab matud pa silay gamay nga pondo sa pagkakaron alang sa maong tumong apan mapasalamaton sila sa LGU GenSan nga suportado ang maong plano.
