GENERAL SANTOS CITY- Nagpabilin sa kustodiya sa CIDG-12 ang usa ka lalaki nga nasikop sa gipahigayon nga entrapment operation sa usa ka mall kagahapong adlawa.
Giila ang dinakpan nga si Richard Roda, 23-anyos, taga-Balabagan, Lanao del Sur, nga gireklamo matud pa sa ubay-ubay ka reklamante gumikan sa gihimong pagpangilad, kung asa kapin 100 matud pa ka mga motorsiklo ang iyang gisibat gikan sa mga nabiktima, human nagpaila nga konektado sa insurance agency.
Sa pakighinabi sa Bombo Radyo, gibutyag ni SPO1 Pablo Jugos nga karong adlawa gikatakdang kasuhan ug large estafa ang suspek, kung asa anaa matud pa sa 41 ang nagpatala nga reklamante, nga pulos mga residente lang sa dakbayan, ug gituuhang madugangan pa.
Base matud pa sa nakalap nga impormasyon, gipangdala sa suspek ang mga gisibat nga motorsiklo sa Lanao.
Ang ginasulti matud pa sa suspek sa iyang mga nabiktima nga iyahang ginapaarkilahan ang nasampit nga mga motorsiklo sa kantidad nga anaa trainta ngadto sa kwarenta mil.
Apan sa maong sitwasyon, dako ang posibilidad nga dili arkila inay ginabaligya ang nasampit nga mga motorsiklo.
Dungan niini, nanawagan si SPO1 Jugos ngadto sa uban pang nabiktima ni Roda nga mahidangat sa ilang buhatan aron magpasang-at usab ug kaso.
