GENERAL SANTOS CITY – Kasamtangan pang ginaberipika sa OWWA-12 ang report kalabot sa usa ka buntis nga OFW nga matud pa namatay sa Dubai human ma-overdose sa pills.
Sa pakighinabi sa Bombo Radyo kang Niño Carbonel sa OWWA-12, gikumpirma niini nga nakadawat usab ug susamang report, kung asa ang nasampit nga OFW giilang si Angel Pauya Trasadas, 34-anyos.
Sa ilang pakig-alayon sa agency ni Trasadas, gibutyag niini nga nakadawat sila ug susamang case endorsement gikan sa OWWA Region 4.
Apan nakabutang matud pa sa address ni Trasadas nga taga-Pangasinan ito, samtang sa passport niini nakabutang nga taga-Maitum, South Cotabato.
Kahibaluan nga ang Maitum ang anaa sa probinsya sa Sarangani ug dili sa South Cotabato. Hinungdan nga gikatakda matud pang magpahigayon ug home visit ang OWWA sa Pangasinan, aron masuta kon tinuod nga taga-didto si Trasadas.
Samtang wala usab matud pay pamilya nga nahidangat sa DFA-GenSan aron magpatabang kalabot sa nadangatan ni Trasadas.
Kahinumduman nga mikatag sa internet ang report kalabot sa nasampit nga OFW, nga matud pa nagbleeding hangtod namatay.
Kini human matud oa ma-overdose sa pills gumikan sa sulay nga ipahagbong ang gisabak.
