GENERAL SANTOS CITY – Subli nga gapanawagan ang SSS ngadto sa katawhan nga hangtud pa sa Oktobre 1, 2018 ang restructuring sa loan o condonation.
Sa pakighinabi sa Bombo Radyo kang si Noel Nacion, senior analyst sa SSS GenSan, gibutyag niini nga may igong panahon pa ang tanang miyembro aron mahidangat sa ilang buhatan aron asikasuhon ang loan nga wala pa nabayaran nga lagpas na sa deadline.
Matud pa nga dili maningil ug interes ang ilang buhatan ning higayona samtang gipatuman pa ang condonation.
Hinungdan nga angayang pahimuslan ang kahigayonan gumikan wala nasayod kung kanu-as usab ipatuman ang maong programa.
Daghan matud pa sa mga miyembro sa SSS ang wala nakabayad sa ilang loan nga gihatagan ug kahigayonan aron mabayaran.
Apan giklaro nga kung may utang ang usa ka miyembro singlon gihapon atol sa ilang pagretiro.
Alang sa mga gusto nga maka-avail sa condonation ug uban pang dugang pangutana, mahimo matud pang muadto buhatan sa SSS sa Labangal Highway.
