GENERAL SANTOS CITY – Gireklamo ang usa ka sundalo ug igsuon niini nga usa ka Criminology graduate human nanggukod matud pa ug nani-on ug pusil.
Giila ang reklamante nga si Roque Taborada, 34-anyos, residente sa Prk. 6, Lanton, Brgy Apopong ning siyudad.
Samtang ang mga gireklamo mao silang Gerald Bales nga miyembro sa 67th IB, ug igsuon nga si John Bales.
Base sa reklamo ni Taborada, kalit lang siyang gikasahan ug pusil sa sundalo, kung asa sa ikaduha niining pagkasa sa armas, midagan na kini padulong kaniya ug gigukod siya. Gikabutyag nga hubog ang sundalo dihang gihimo ang sa ingon, ug daghang mga silingan matud pa ang nakasaksi sa insidente. Human niini, nangayo matud pa ug pasaylo kanila ang managsuon, hinungdan nga iyaha usab gipasaylo.
Apan nakurat na lamang matud pa siya dihang gipa-blotter siya sa managsuon sa Makar Police Station, ug karon gipasanginlan nga nangbato ug nangawat ug pabo.
Hinungdan nga nagpatabang sila sa Bombo Radyo, ug gihingusgan nga wala gihimo ang nasampit nga alegasyon, tungod sila gani ang naagrabyado.
