GENERAL SANTOS CITY- Blangko pa ang mga imbestigador sa Makar Police Station ang motibo ug ilhanan sa suspek nga mipatay sa cowboy o caretaker nga nakaplagang patay kagahapon sa buntag sa kasagbutan sa Bibiana Farm, sa Brgy Apopong ning dakbayan.
Nagpabilin karon sa usa ka punerarya ang patay’ng lawas sa nagpangalan ug Roel Magsalang, 40-anyos, nga taga-Sta. Maria, Davao Del Sur, samtang nagpadayon ang pagpangalap ug dugang impormasyon sa kapulisan, may kalabutan sa pagpatay sa biktima.
Kahibaluan nga gituuhang gibunalan ug gahi nga butang ang biktima nga maoy hinungdan sa iyang kamatayon.
Una niini, ulahi matud pang nakit-an ang biktima nga lango sa ilimnun, una nakaplagan nga patay pagkabuntag.
Nanawagan usab ang kapulisan ngadto sa mga may kasayuran o nakakita sa krimen nga makig-alayon kanila, aron mailhan ang mihimo niini.
