GENERAL SANTOS CITY – Nalisdan nga makagawas sa ilang mga pinuy-anan ang pipila ka mga residente sa Ishigaki, Okinawa sa nasud Japan, gumikan sa nasinatian nga Typhoon Hachigo nga may international name nga Maria.
Kini ang gibutyag sa Bombo Radyo ni Aiko Matchu, usa ka Filipina-Japanese nga taga-Koronadal City, South Cotabato, apan kasamtangang gapuyo sa usa ka isla sa probinsya sa Ishigaki.
Sumala pa nga sa kakusog sa hangin ug ulan, nalisdan sila nga maablehan ang ilang pultahan, gawas pa nga palong-sindi ang mga suga sa ilang panimalay hinungdan nga gipili na lamang nila nga magpabilin sa sulod.
Bisan paman, typhoon proof matud pa ang ilang pinuy-anan hinungdan nga luwas ug kumpiyansa matud pa ang ilang pamilya, apan pabiling nakaalerto ug kanunay’ng gabantay sa mga weather updates ug balita sa palibot.
Wala usab matud pay baha sa gawas nila, gumikan wala matud pay basura sa palibot, dili sama sa Pilipinas.
Base usab sa ubang Pinoy nga kaila nila sa ubang bahin sa Japan hilabi na sa Fukuoka, luwas na matud pa ang mga nasampit luyo nga may gamay’ng kabalaka gumikan sa bagyo.
