GENERAL SANTOS CITY – Nadawat na sa mga mananaog sa grand draw sa nakalabay’ng promo sa Bombo nga Buena Mano Salvo Year 13 ang ilang premyo.
Kini human ang natigayong awarding kagahapong adlawa nga gipahigayon dinhi mismo sa sibyahanan. Malipayong gidawat ni Jelbert Lastimoso, taga-Sta. Cruz, Cannery, Polomolok, South Cotabato ang iyang premyo nga P5,000 isip third winner.
Gamiton matud pa niya ang nadag-an nga salapi sa iyang plano niyang pagtungha sa kolehiyo.
Samtang P10,000 usab ang nadawat ni Joseph Abellera nga taga-Zone 2 Blk 0, Brgy Fatima ning siyudad. Gilayon niyang giintrigo ang nadag-an nga salapi sa iyang inahan , nga mao matud pa ang pinaka-naghago sa paghimo ug entries.
Samtang, bisan ug medyo layo ang ilahang lugar, wala palampasa ni si Bonifacio Bayato Jr. nga taga-Limonso Lutay, Malungon, Sarangani Province ang higayon, ug gikuha ang iyang premyo nga P15,000.
Sumala pa nga karon pa lang siya nakahupot ug susama kadako nga kantidad sa salapi.
Samtang, padayon ang padawat sa sibyahanan ug mga entries alang sa Swerte sa Palengke 2018. Kahibaluan nga ang palengke draw ang magsugod na sa adlaw’ng Sabado, kung asa may 20 ka palarong winners sa tig-P500 nga kantidad sa grocery ug P500 nga cash.
Samtang matag semana may makadaog usab ug P5,000 isip first prize; P4,000 ang second prize, ug P3,000 ang third prize sa studio draw.
