GENERAL SANTOS CITY -Gibulabog ang mga residente sa General Santos City sa nahitabo nga makusog nga pagtay-og alas-6:00 kagabii.
Nabati sa mga tawo ang makusog nga paglihok sa yuta, nagresulta ug kabalaka sa mga residente, hilabi na nga nagpalong sindi ang mga suga sa pipila ka mga kabalayan ug establisyimento atul sa naasoy’ng pagtay-og.
Gibati usab ug kabalaka ang mga tawo nga nahimutan duol sa dagat, partikular na sa Queen Tuna Park.
Nanggawas usab ang mga tawo sa mga malls, apil na ang mga estudyante sa mga kolehiyo.
Nangabuak usab ang mga samin sa pipila ka mga tindahan, gumikan sa maong linog. Pipila sa mga residente ang nangalipong, human nga milungtad ug halos tunga sa minuto ang linog.
Nagpanic usab ang pipila sa mga pasyente ug bantay nila sa mga balay-tambalanan, hilabi na sa mga nahimutang sa mga taas nga andana.
Kahibaluan nga base sa initial nga report sa Philippine Institute of Volcanology and Seismology (Phivolcs), usa ka 5.8 magnitude nga linog nang nahitabo, kung asa ang sentro ang sa Malungon, Sarangani.
Apan gipa-ubos kini sa magnitude 5.6, kung asa sa habagatang sidlakan matud pa sa Glan, Sarangani ang sentro.
May gilawmon kini nga 4km ug tectonc in origin. Matud sa Phivolcs, Intensity 5 nga pagtay-og ang nasinatian sa Glan, Malapatan, Alabel ug Malungon, Sarangani Province; apil na sa Tupi ug Polomolok, South Cotabato.
Intensity 4 usab sa Mati City; Davao City ug Sta. Cruz, Davao del Sur. Sa Instrumental Intensities, Intensity 5 matud pa ang nasinatian sa General Santos City ug Alabel, Sarangani Province.
Samtang, Intensity 2 sa Kidapawan City. Hinuon, walay natala nga grabeng kadaot sa mga establisyimento, o kaha mga tawo nga nasamdan tungod sa linog.
