GENERAL SANTOS CITY – Padayon ang hugot nga pagbansay ni eight division world champion ug Sen. Manny Pacquiao, pipila ka adlaw ang nahibilin una mulupad ang Team Pacquiao sa Kuala Lumpur, Malaysia, sa Hulyo 9.
Kini luyo nga miabot na sa peak ang kondisyon sa fighting senator, kung asa miaging semana nakapahigayon na kini ug 12 ka rounds sa sparring session.
Una nang gibutyag ni Coach Buboy Fernandez nga muubos na ning semanaha ang ipahigayon nila nga sparring sessions, human miabot ang 95 percent nga kondisyon.
Kagahapong adlawa, sa iyang Wild Card Gym, nagpahigayon lamang si Pacquiao ug 12 rounds sa spar mitts, double end, speed ball, ug uban pa.
Una nang gibutyag ni Coach Buboy nga ginalikayan nila nga mataptan sa sakit ang fighting senator, aron walay mamahimong problema una ang away batok kang Lucas Matthysse sa Hulyo 15.
