GENERAL SANTOS CITY – Giangkon ni Coach Buboy Fernandez nga karon nga nagkaduol na gayud ang away kang Lucas Matthysse, ginalikayan nila nga mataptan sa sakit si eight division world champion ug Sen. Manny Pacquiao.
Sa pakighinabi sa Bombo Radyo, gibutyag ni Coach Buboy Fernandez nga lisod na kon kalit mataptan ug sip-on o kaha ubo si Pacquiao.
Hinuon, sa karon, kuntento matud pa sila sa kasamtangang dagan sa pagbansay sa fighting senator.
Matud pa, nakita na matud pa nila ang maayong resulta sa pipila ka bulan nga pagbansay sama sa mga technique, lihok ug kinumo nga gamiton, ug depensa nga gikinahanglan.
Ug gani, una nang gipasigarbo sa Pinoy coach nga 95 percent na’ng kondisyon si Pacman, human nga nakaabot na sa 12 rounds nga sparring sessions miaging semana.
Sa karon, imintina una matud pa sila sa maong kondisyon ug magbilin una ug lima ka porsyento, alang sa unsa mang adjustments.
Samtang karong semanaha anam-anam na matud pang muubos ang sparring sessions, nga mubalik sa 10 paubos.
