GENERAL SANTOS CITY – Padayong sa pagpangalap ug impormasyon ang mga ginsakpan sa Makar Police Station, aron mailhan ang kawatan nga midunggab-patay sa usa ka gwardiya sa usa ka bodega sa National Highway, Brgy Apopong ning siyudad.
Una nang giila ni Police Chief Inspector Patrich Elma, hepe sa nasampit nga presinto, ang biktima nga si Danilo Deocades, taga-Balunto, Brgy Labangal.
Sa imbestigasyon, ang usa matud pa ka babaye ang misinggit nga nangayo ug tabang gumikan gikawat ang iyang TV sa usa ka compound duol sa lugar.
Miresponde matud pa si Deocades apan siya hinuon ang nadunggaban sa kawatan gamit ang kutsilyo.
Nakaangkon siya ug samad-dinunggaban sa dughan nga maoy hinungdan sa iyang kamatayon, naabtan na lamang kini sa mga tawo nga patay na.
Gikatakda matud pang makig-alayon ang kapulisan sa babaye nga nakakita sa kawatan alang sa dugang nga imbestigasyon.
Kini aron makahimo ug facial composite sketch.
Ipakita usab matud pa nila sa nahisgutang babaye ang mga hulagway sa mga kawatan aron masayran kon ang suspek ang anaa lakip sa ilang listahan.
