GENERAL SANTOS CITY – Nagpabiling naka-hospital arrest matud pa sa usa ka tambalanan sa Calumpang ning syudad si kanhi GenSan City Councilor Rodrigo Boy Olarte. Bantay sirado gihapon matud pa ang nasampit sa kapulisan human nga giaresto tungod sa narekober nga usa ka granada sa opisina niini sa KPS Foundation Inc sa Prk. Magsaysay Labangal, kung asa chairman ang nasampit.
Kahinumduman, sa gipahigayong raid aging adlaw, nagnegatibo sa mga armas ang opisina ni Olarte apan nakarekober ang kapulisan ug usa ka granada sa drawer sa lamesa sa treasurer niini nga si Arlene Bohol.
Sa pakighinabi sa kampo ni Olarte, gituohan niining ‘planted’ kon gitanom lang ang ekplosibo.
Hinungdan nga giaresto ang nasampit ug gidala sa Makar Police Station kung asa daghan mga supporters niya ang nanunod sa presinto.
Sa dugang pahayag sa kampo ni Olarte nga posibleng ang land conflict sa Espina State o pulitika ang nagpaluyo sa pausob-usob nga pag-raid kay Boy Olarte.
Apan sumala pa sa kapulisan nga lig-on ang ebidensiya nga ilang gihuptan.
Kahibaluan nga si Olarte, maoy lider sa mga claimants sa 973 hectares nga Espina State sa Brgy Labangal.
