GENERAL SANTOS CITY – Miabot na ang duha ka bag-ong spar mates ni eight division world champion ug Senator Manny Pacquiao.
Kagahapon sa buntag dihang miabot silang Jeric Chavez nga taga-Cebu, ug Raymond Yanong nga taga-Negros Occidental.
Sila ang mihulip sa duha ka nauna nga spar mates ni Pacquiao nga silang Ricky Simundo ug Arnel Tinampay nga managsamang taga-Bohol.
Pagkahapon midiretso ang duha sa Wild Card Gym ug nakigdungan sa pagbansay sa Team Pacquiao.
Kahibaluan nga time-out una sa sparring sessions ang fighting senator kagahapong adlawa, apan nagpahigayon kini ug 10 rounds sa spar mitts ug uban pang routines kauban si Head Coach Buboy Fernandez.
Samtang, kauban nga nagbansay sa Team Pacquiao ang lain pang Pinoy boxer nga si Jeric Tipura, ug ang Chinese nga si Liu Bin, nga managsamang may undercard fight sa Pacquiao-Matthysse bout sa July 15, sa Kuala Lumpur, Malaysia.
