GENERAL SANTOS CITY – Gikumpirma sa Bombo Radyo sa General Santos City Police Office nga gikan na sa Lanton City Jail si Angelito Avenido Jr., ang suspek sa pagpatay sa lima ka bulan nga buntis nga assistant prosecutor sa Ombudsman nga si Atty. Madonna Joy Tanyag.
Matud ni Police Senior Inspector Davis Dulawan, tigpamaba sa GSCPO, base sa ilang records, may kasong murder si Avenido nga hinungdan sa iyang pagkabilanggo sa city jail kaniadto, kung asa nakapiyansa kini.
Human nakagawas sa bulangguan, gidunggab-patay usab niini ang nagpangalan ug Noel Gallardo, nga nahitabo matud pa kini kaniadtong Pebrero 27 ning tuiga, sa Brgy Bula ning siyudad. Apan at-large siya sa maong kaso, ug miadto sa Kauluhan.
Kahibaluan nga naaresto si Avenido sa gipahigayong hot pursuit operation human makakuha ug kopya sa CCTV footage ang Quezon City Police District ug testigo nga nagtudlo sa gikahimutangan ni Avenido.
Gikabutyag nga bangag pa sa iligal nga droga ang suspek dihang maaresto sa mga pulis. Una nang gihingusgan ni Police Director General Oscar Albayalde nga walay kalabutan sa trabaho sa biktima sa Ombudsman ang krimen.
