GENERAL SANTOS CITY – Wala gihapon nakalimtan ni eight division world champion ug Sen. Manny Pacquiao nga mutabang sa mga nagkinahanglan, bisan ug anaa na sa hugot nga lebel sa training alang sa umaabot nga away kang Lucas Matthysse sa Hulyo 15.
Kini human niya gitabangan ang usa ka ice cream vendor nga iyang nakahimamat kagahapong adlawa, Dominggo, samtang gi-enjoy ang weekend, una mubalik sa training ning adlawa.
Una niini, usa sa mga kauban sa senador ang mitawag sa suki matud pa niini nga ice cream vendor ug mipalit gumikan sa kainit sa panahon.
Ingon na lamang ang kakurat sa nahisgutang vendor nga giilang si Manong Marciano human kalit siyang gipatawag ug nakita ang senador, kung asa gihatagan siya ug P3,000.
Kita sa video nga gi-post sa social media, si Sen. Pacquiao samtang gakaon ug ice cream stick, ug giistorya ang nahisgutang vendor nga daw sa dili makatuo nga ang fighting senator ang iyang kaatubang.
Human sa gamay’ng pakig-istorya, dugang P30,000 nga cash ang gihatag ni Pacquiao kaniya, gawas pa sa saad nga house and lot, ug scholarship alang sa iyang mga anak katambayayong ang usa ka institusyon dinhi sa siyudad.
Kini human nasayran nga nag-arkila lamang ug balay si Manong Marciano, ug wala pa nakapa-enroll ang iyang tulo ka anak.
Gikabutyag nga naluoy ang senador sa ice cream vendor gumikan naningkamot gihapon nga malibod-suroy sa iyang mga baligya bisan sa kainit sa panahon, bisan ug kanhi nang na-stroke.
