GENERAL SANTOS CITY – Halos 100,000 ka mga magtutungha ang gilaumang i-usbaw sa mga magtutungha sa elementary ug high school dinhi sa Region 12, sa pag-able sa klase sa Hunyo.
Aminado ang DepEd 12 nga kulangon ang mga lawak-tulunghaan sa tibuok rehiyon alang sa nahisgutang pag-usbaw sa ihap sa mga estudyante, hilabi na kon sundon nila ang standard nga 45 ka magtutungha matag classroom.
Kini ang rason nganong karon nga Brigada Eskwela gapangita sila ug mga partner, nga andam nga mutabang kanila ug malungtaron.
Ug gani, dinhi sa Region 12, mas sayo nga nagsugod ang Brigada Eskwela. Gitawag nila kining Brigada Eskwela Plus nga mulungtad sa tibuok school year.
Samtang, anaa usab matud pa sa 60,000 ang gilaumang musulod sa senior high school ning kasamtangang school year. Apan nasayod na matud pa ang DepEd nga daghan ang mamalhin sa private schools.
Kini gumikan limitado lang ang ginatanyag nga technical vocational livelihood courses.
Apan mupailawom gihapon ang mga transferee sa joint delivery voucher program kon JDVP, kung asa ang DEpEd ang mutabang sa mga estudyante nga magtungha sa private school nga partner sa public school nga naka-enrol usa ka public school.
