GENERAL SANTOS CITY – Giablehan na sa Malungon, Sarangani Province ang labing unang Balay Silangan, usa ka reformatory center alang sa mga drug surrenderee nga buot nang magbag-o ug kinabuhi.
Kapin sa 120 ka mga drug surrenderee ang mupailawom sa family-based rehab sa nahisgutang pasilidad nga gimugna sa pagtambayayong sa lokal nga panggamhanan sa Malungon ug Philippine Drug Enforcement Agency. Kini ang labing una sa Mindanao, kung asa gipahigayon ang launching kagahapong adlawa, kung asa nahimong dinapit nga bisita si PDEA Director General Aaron Aquino.
Nasayran nga adunay kapin 1,300 ka drug surrenderees sa Malungon ug padayon pa nga may mga gasurrender. Hinungdan nga mamahimong prayoridad sa Balay Silangan ang mga taga-Malungon.
Mulungtad ug duha ngadto sa tulo ka bulan ang reformation program sa usa ka drug surrenderee sa nahisgutang pasilidad.
Apan kon masuta nga severe type ang usa ka surrenderee, mahimo siyang i-refer sa Regional Drug Rehabilitation Center nga kasamtangang nagpadayon ang konstruksyon sa Kawas, Alabel, Sarangani.
Gipondohan kini sa gobyerno sa China, sa kantidad nga P350 million, ug gilaumang makasugod sa pag-operate sunod tuig.
