GENERAL SANTOS CITY – Anaa pa lang sa 40% ang kondisyon ni eight division world champion ug senator Manny Pacquiao, sa iyang pagbansay alang sa umaabot nga away batok kang Lucas Matthysse sa Hulyo 15.
Kini ang gikumpirma mismo sa Bombo Radyo ni Head Coach Buboy Fernandez, kung asa giangkon niini nga nalipay siya sa nahimong development sa nagpadayon nilang training camp.
Nalipay usab matud pa siya gumikan nagkahiusa silang tanan karon sa all-Filipino nga Team Pacquiao, sa pangandoy nga makab-ot ang kondisyon nga buot nilang makab-ot ni Pacman alang sa away.
Sa karon kinahanglan matud pang mapabilin ang stamina sa fighting senator, ug daghan pa ang mga kinahanglang himuon aron mapabalik ang speed ug mga strategies ug techniques nga gamiton nila kang Matthysse.
Samtang, nakadayeg pag-ayo si former national coach Ting Ariosa kang Pacquiao, sa performance nga ginapakita niini sa training camp.
Kini human nga nakigbayluanay sila nilang Head Coach Buboy Fernandez ug Nonito Donaire Sr., sa punch mitts, kung asa wala matud pay laing boksidor nga my pinakakusog ug pinakapaspas nga kinumo gawas kang Pacquiao.
Ug gani, matud ni Ariosa nga bisan ug ginakontrola ni Pacquiao usahay ang pag-igo kaniya, matay-og gihapon siya sa kakusog sa impact sa kinumo niini.
Wala usab matud pa sila naglisod sa pagbansay kang Pacquiao gumikan maayo ang ilang pagsinabtanay, ug apil kini sa pakigbayluanay ug mga ideya ug giya alang sa mas maayo ug nindot nga mga estratehiya.
Samtang, gibutyag usab ni Sen. Pacquiao, nga relax lang siya sa nagpadayon niyang pagbansay.
Sa pakighinabi sa Bombo Radyo, gibutyag sa Pinoy ring icon nga layo pa ang away, apan anam-anam nang gabalik ang iyang speed ug kondisyon.
Hinungdan nga gapugong una matud pa siya, aron usab dili ma-overtrain.
