GENERAL SANTOS CITY- Padayong naka-heightened alert ang probinsya sa South Cotabato, gumikan sa natigayong pagbusikad sa usa ka eksplosibo miaging Dominggo sa gawas sa katedral sa Koronadal City.
Sa pakighinabi sa Bombo Radyo kang Police Supt. Marvin Dua-Dua, tigpamaba sa South Cotabato Police Provincial Office wala pa gihapon gipaubos sa kapulisan ang hugot nga pagbantay sa seguridad sa ilang area of responsibility, batok sa mga dili maayong plano sa mga dautang tawo.
Kini aron dili na masubli ang nahitabo, gawas pa nga padayon ang pagpatuman sa Martial Law ug election period.
Giangkon sa nasampit nga opisyal nga kaniadto pa nakadawat ug bahad sa susamang pag-atake, apan wala matud pa nagpasagad ang kapulisan sa probinsya.
Samtang, kalabot sa nagpadayong imbestigasyon sa naasoy’ng insidente, mibalibad una ang mga otoridad nga magpagawas ug detalye kalabot ginatumbok nilang duha ka suspek, lakip ang motibo sa gihimong pagpamomba.
Bisan paman, gipasalig ni P/Supt. Dua-Dua nga mag-atubang ug kaso ang responsable sa naasoy’ng insidente.
