GENERAL SANTOS CITY – Gipangkasuhan na sa Philippine Drug Enforcement Agendy (PDEA-12) ang duha ka estudyante nga nasikop sa gipahigayong buy-bust operation sa Miranda St., Polomolok, South Cotabato, kaniadtong Biyernes sa gabii.
Kahibaluan nga sa pakighinabi sa Bombo Radyo kang Joni Ress Layso, acting spokesperson sa PDEA-12, giila niini ang mga dinakpan nga sila si Jechael Manipon, 24-anyos, ug Ariel Delina, 21-anyos, pulos mga gikonsiderang high value targets, nag residente sa Purok Miana, Poblacion, Polomolok, South Cotabato.
Kini human malampusong napalitan sa pulis nga nagpailang poseur buyer ug shabu ang mga suspek, sa kantidad nga P1,000.
Gawas niini, narekober usab gikan sa duruha ang laing tulo ka sachet sa gituuhang shabu nga may gibug-aton nga 51 grams, ug may estimated market value nga dul-an P350,000.
Kasong pagsupak sa Sections 5 kon pagbaligya, Section 11 paghupot, ug 26 (b) (Conspiracy to sell) sa RA 9165 kon The Comprehensive Dangerous Drugs Act of 2002 ang atubangan sa duha ka estudyante.
Samtang, padayong ginamonitor sa mga ginsakpan sa PDEA ang mga kaubanan sa duruha nga nagpabiling gawasnon.
