GENERAL SANTOS CITY – Gipasalig ni Coach Buboy Fernandez nga gitun-an nila pag-ayo ang mga lihok sa Argentine boxer na si Lucas Matthysse.
Sa pakighinabi sa Bombo Radyo, gibutyag ni Fernandez nga dili basta-basta nga kaatbang si Matthysse, hilabi na nga usa usab kini ka kampeon.
Hinungdan nga gipasalig sa Pinoy coach nga himuon ang tanan aron mahimong kondisyon kaayo si eight division world champion ug Sen. Manny Pacquiao, alang sa gikatakdang away sa Hulyo 15, sa Kuala Lumpur, Malaysia.
Kumpiyansa usab si Buboy nga paigo na ang all-Filipino Team Pacquiao, sa pagpangandam sa Pinoy ring icon sa maong away.
Kauban ni Fernandez sa pagbansay kang Pacquiao si assistant Coach Nonoy Neri, samtang gapangita pa sila ug mga Pinoy boxers aron mahimong sparring partners.
Karong buntaga, isip kabahin sa light training, subling mag-jogging ang fighting senator sa Acharon Sports Complex dinhi sa siyudad, samtang gapangita pa sila ug perpektong taas nga lugar sa GenSan o sa Sarangani, alang sa high altitude training.
