GENERAL SANTOS CITY -Gikustodiya karon sa CIDG-12 ang 16 ka babaye ang na-rescue human sa gipahigayong raid sa usa ka KTV bar sa national highway, Brgy Lagao ning siyudad, partikular ang Cowgirl Bikini and KTV Bar.
Nahitabo kini bandang alas-11:00 kagabii, kung asa arestado ang usa ka Korean national nga giilang si Seok Choi, nga mao matud pay tag-iya sa nahisgutang balay-kalingawan.
Sa pakighinabi sa Bombo Radyo kang SPO1 Pablo Jugos, sa special operation unit sa CIDG-12, makapila ka higayon nilang gisudlan ang nasampit nga bar gumikan sa mga nadawat nga reklamo ug taho nga may mga babaye nga gasayaw ug hubo.
Ug kagabii, atul sa raid, “caught on the act” ang pipila ka mga kababaihan samtang gasayaw ibabaw sa stage nga walay bisan unsa nga tabon sa lawas.
Gumikan niini, gikatakdang pasakaan ug kasong may kalabutan sa “indecent show” ang mga aktwal nga naabtan nga nagsayaw ug hubo, lakip ang gikabutyag nga tag-iya sa bar.
Gikandado na sa mga otoridad ang naasoy’ng establisyimento.
