GENERAL SANTOS CITY – Gibanabanaang mukabat sa P500,000 ang kantidad sa damyos sa Bureau of Fire Protection human gisunog sa mga armadong kalalakihan ang usa ka bodega sa usa ka banana packing plant sa Sitio Kalpisot, Brgy Lunen, Tupi, South Cotabato, kagabii.
Sa pakighinabi sa Bombo Radyo, gibutyag ni Police Senior Inspector Bernie Faldas, hepe sa Tupi Municipal Police Station, nga natigayon ang insidente alas-7:00 sa gabii, kung asa unom matud pa ka wala mailhing armadong suspetsado ang misulod sa Dole Stanfilco packing plant.
Una niini, gikabutyag nga gimanduan sa mga suspek ang guwardiya nga si Rio Alegria, 41-anyos, taga-Crossing Rubber, Tupi, Polomolok, ug lain pang unom ka trabahante, nga magtapok didto sa main gate, ug gipangkuha ang ilang mga cellphone, aron dili sila pasakitan, gumikan ang tumong lamang nila mao ang sunugon ang naasoy’ng pasilidad.
Nasayran nga walay armas ang nahisgutang gwardiya. Gibubuan gilayon sa mga suspek ug galon sa gasolina ang nahisgutang pasilidad ug gidauban, ug paspas nga nanibat sa wala matino nga direksyon.
Sa karon padayon ang gihimong imbestigasyon sa mga otoridad, samtang nakig-alayon sa mga kasundaluhan alang sa nagpadayon nga follow-up and pursuit operation.
Gikabutyag nga intimidation kon pagpanghasi ang motibo sa naasoy’ng pagpanunog.
