GENERAL SANTOS CITY – Dako ang pagsalig sa Team Pacquiao sa posibilidad nga mapildi ni eight division world champion Manny Pacquiao si Lucas Matthysse, sa umaabot nilang away sa Hulyo 14 sa Kuala Lumpur, Malaysia.
Gibutyag sa Bombo Radyo ni Aquiles Zonio, media officer ni Pacquiao, nga sa Abril 21 pa magsugod sa iyang light training ang senador.
Hinungdan nga wala unay natigayon nga pagjogging ug uban pang training kagahapong adlawa, luyo nga upat ka games sa basketball ang gihimo ni Pacauiao, human nahidangat sa siyudad miaging adlaw.
Samtang, giangkon usab sa Bombo Radyo ni Zonio nga gi-underestimate kaniadto ni Coach Freddie Roach si Australian boxer Jeff Horn, hinungdan nga napildi si Pacquiao.
Ug gani, kanunay matud pang ginabutyag kaniadto sa Hall of famer coach nga tune-up fight lang ang maong away, hinungdan nga wala kaayo natutukan ug napangandaman ang kabagsik ni Horn sa ring.
Apan sa umaabot nga away kang Matthysse, dako ang tyansa nga mudaog na ang Pinoy ring icon, hilabi na kon dili matud pa mag-usab ug fighting style ang Argentinian boxer, nga mahilig muatake sa kalaban nga maoy kinaham sa fighting senator.
