GENERAL SANTOS CITY – May ginatan-aw na nga anggulo ang mga imbestigador sa Makar Police Station, may kalabutan sa pagpusil-patay sa usa ka 17-anyos kagabii sulod sa usa ka bilyaran sa Prk 10 Phase 2, Mangga St. Lanton Apopong ning siyudad.
Kini ang gibutyag sa Bombo Radyo ni Police Chief Inspector Renato Salarda, hepe sa nasampit nga presinto, human nasuta nga kanhi nang gireklamo sa barangay ang biktima nga si Rondel Varquez, taga Prk. 15 Lanton, Apopong, gumikan sa pagpangawat matud pa ug manok.
Hinuon, padayon pa sa pagpangalap ug dugang impormasyon ang kapulisan kalabot sa insidente.
Kahibaluan nga base sa pahayag sa mga saksi, gipusil ang biktima samtang gadula ug billiard.
Nangutana matud pa pa ang mga suspek sa biktima kung “Rondel” ang pangalan niini ug dihang mitubag og “oo”, kalit nga gipusil lima ka higayon.
Gipuntirya sa unang suspek sa pagpusil ang tiyan nga bahin sa biktima ug pagkatumba niini, gitiwasan sa kauban nga suspek sa dughan ug ulo nga bahin hinungdan sa hinanaling kamatayon niini.
Sa karon nanawagan si P/C/Insp. Salarda ngadto sa mga nakasaksin sa krimen nga makig-alayon kanila, aron makatabang sa pag-ila sa mga suspek.
