GENERAL SANTOS CITY – Emosyunal nga gipadayag ni Charmaine Venarao, ang kasakit nga gibati gumikan sa nadangatan sa iyang inahan nga si Veronica Venarao, ang Pinay DH nga namatay human nahagbong sa hagdanan ug na-comatose sa Saudi Arabia.
Kini human nahidangat sa dakbayan ang patay’ng lawas sa iyang inahan sulod na sa usa ka lungon, alas-9:30 kaganihang buntag, sakay sa direct flight gikan sa Saudi Arabia, ug gisugat sa iyang pamilya ug pipila ka opisyal sa gobyerno.
Sa pakighinabi sa Bombo Radyo, gihinumdum pa ni Charmaine ang mga kahigayunan nga kauban pa nila ang inahan, apil na kadtong miadto na sa Saudi ang inahan, ug ang ulahi nilang panag-istorya pinaagi sa chat, kung asa nabati gayud niya ang pagmahal kaniya niini.
Dungan niini, giangkon ni Charmaine nga gaparamdam kanila ang inahan, kung asa usahay kon mag-ampo sila, may madunggan sila nga mga lagubo sa ilang lawak.
Si Charmaine, anak ni Veronica Venarao.
