GENERAL SANTOS CITY – Gisalang karong adlawa sa unang pagbasa sa Sangguniang Panglungsod ang “Funeral Chapel Ordinance” nga may kalabutan sa pagbawal sa open chapels sa mga funeral parlor kon punerarya dinhi sa siyudad.
Ang maong ordinansa ang giduso ni City Councilor Rosalita Nuñez.
Kahibaluan nga sagad sa mga karaan na nga punerarya dinhi sa dakbayan ang adunay able nga slumber room kon lugar alang sa mga haya, kung asa nakita sa mga konsehal nga posibleng magdala ug risgo sa mga gatambong sa haya, hilabi na nga able sa publiko ug pwedeng masudlan sa mga tawo nga may dautang tuyo.
Hinungdan nga gisugyot ni Konsehal Nuñez nga himuong sirado ang mga chapel sa punerarya, aron makaangkon ug privacy ang mga nagbangutan nga pamilya, lakip ang mitambong sa haya, ug mahimong luwas sa mga dautang elemento.
Nakalatid usab sa nasampit nga ordinansa nga kinahanglang adunay “atleast” usa ka gwardiya sa matag punerarya, ug ang pagbawal sa pag-inum ug mga alcoholic beverages ug bisan unsang matang sa sugal sa slumber room kon lugar sa haya.
Base sa ordinansa, ang mag madakpan nga nakasupak o wala mituman ang hatagan ug unom ka bulan nga grace period aron mag-comply sa mga rekositos.
Aduna usay gitakda nga multa nga P1,000 o usa ka bulan nga pagkabilanggo sa first offense; P2,000 ug duha ka bulan nga pagkabilanggo alang sa second offense; ug P5,000 ug tulo ka bulan nga pagkabilanggo ug kanselasyon sa business permit alang sa ikatulo nga pagsupak.
