GENERAL SANTOS CITY – Gipresenta na atul sa sesyon kaganihang buntag sa Sangguniang Panglungsod si Reymart “Assassin” Gaballo, ang bag-ong gikoronahan nga WBA world bantamweight interim champion.
Dungan niini, gipasalamatan ni Gaballo ang tanan nga misuporta kaniya, hilabi na sa nagpaluyo kaniya nga mao ang Sanman Promotions.
Una niini, gihatagan si Gaballo ug grand homecoming sa pag-uli niini sa dakbayan kaniadtong Biyernes, Marso 30.
Kahibaluan nga bag-uhay lang naangkon ni Gaballo ang iyang bakus pinaagi sa unanimous decision batok kang undefeated American boxer Stephon Young sa miaging Marso 23 sa natigayong engkwentro sa Florida, USA.
May natigayon nga motorcade kung asa milahos sa Mt. Sabrina Hotel and Resort. Matud pa sa iyang promoter nga si Jim Claude Mananquil, nga nalipay siya sa nadangatan karon ni Gaballo.
Ang mga ginikanan sa GenSan boxer ang nalipay pagmaayo sa kalampusan sa ilang anak. Bisag wala pay schedule sa sunod nga engkwentro, sugdan na matud pa ni Gaballo ang iyang light training sa Sanman Gym.
