GENERAL SANTOS CITY- Duha ang patay duha usab ang sikop human ang gipahigayong search operation sa Regional Police Drug Enforcement Unit (RPDEU) kaganihang buntag sa managlaing purok sa Brgy Baluan ning dakbayan.
Base sa upat ka search warrant nga gipatuman, unang gisulod ang panimalay ni Antonio Villaplana Jr, usa ka panday, sa Prk San Vicente, kung asa gikabutyag nga may pusil ug misukol kini hinungdan nga napugos ang kapulisan nga pusilon siya.
Nadala pa siya sa balay-tambalanan apan nakabsan gihapon sa kinabuhi. Narekober sa iyang balay ang usa ka 38 revolver nga may unod nga mga bala, ug tulo ka sachet sa shabu.
Matud ni P/C/Insp. Bryan Salazar, labaw sa RPDEU, wala pa nila makumpirma ang nanggawas nga taho nga usa ka notorius holdupper si Villaplana.
Sunod nga gironda ang panimalay ni Rowel Magaway sa Prk. Mapagmahal, kung asa gikabutyag nga misukol usab hinungdan nga napusilan-patay.
Narekober usab sa iyang posisyon ang usa ka caliber 45 pistol, mga bala ug tulo ka sachet sa shabu. Matud kang Kapitan Arman Diamante, kanhing drug surrenderee si Magaway apan wala na miapil sa Community-Based Rehabilitation Program (CBRP).
Samtang, mipalag ang pamilya sa duruha ug gihingusgan nga gipusil nga walay kalaban-laban silang Villaplana ug Magaway.
