GENERAL SANTOS CITY – Love triangle ang usa sa daghang mga anggulo nga ginatutukan sa mga imbestigador sa Tupi Municipal Police Station, kalabot sa pagpusil-patay sa usa ka tricycle driver nga gipusil kaniadtong Sabado de Gloria, Polonuling, Tupi, South Cotabato.

Giila ang biktima nga si Teng Dimalao, 54-anyos, residente sa nasampit nga lugar.

Sa imbestigasyon, nakatulog sa iyang tricycle ang biktima samtang nagpaabot sa iyang turno sa terminal sa may Crossing Polonuling, kauban ang lain pang tulo ka tricycle.

Apan kalit matud pang miabot ang mga suspek nga riding in tandem nga pulos naka-maskara.

Gipusil ang biktima sa tulo ka higayon gamit ang caliber 45 pistol, nga maoy hinungdan sa iyag kamatayon.

Gikabutyag nga nakita sa tulo ka kauban sa biktima ang mga gunman, apan wala nailhan tungod naka-bonnet.

Sa pagkakaron padayon ang ginahimong imbestigasyon sa mga sakop ni P/C/Insp. Bernie Faldas may kalabutan sa nahisgutang krimen.

Nasayran nga gilubong gilayon ang patay’ng lawas sa biktima base sa tinuuhang Islam.