GENERAL SANTOS CITY – Patay ang usa ka lalaki human nakuryentehan, human lamang gisugo nga putlon ang sanga sa kamunggay.
Giila ang biktima nga si Rene Boy Maningo alyas Naruto, taga Silway.
Sa pakighinabi sa Bombo Radyo kang Ariel Maningo, igsuon sa biktima, gibutyag niini nga gisugo ang iyang igsuon sa usa ka pulis, aron putlon ang sanga sa kamunggay, bugti sa P250.
Apan dihang usa ka sanga na lang ang nahibilin, misangko matud pa sa livewire ang gigunitan nga kahoy sa biktima hinungdan nga nakuryentehan.
Nahagbong matud pa ang biktima sa yuta ug gidala pa sa ospital apan wala gidawat sa unang duha ka balay-tambalan nga gidal-an kaniya.
Pag-abot sa Doctors Hospital, wala na kini midugay ug nakabsan sa kinabuhi.
Hinuon, ang pulis matud pa nga nagsugo sa biktima ang maoy nagtabang sa pagdala sa ospital ug miabaga karon sa gastos.
