GENERAL SANTOS CITY – Naluwas sa usa ka amahan ang iyang mag-inahan, human matud pa gisulayan ug hikog sa iyang asawa ug plano pa untang apilon ang anak, pinaagi sa paghiwa sa ilang pulso.
Natigayon kini Dominggo sa kaadlawon, kung asa samtang natulog matud pa ang pamilya nga nagpuyo sa Brgy Sinawal.
Kalit mibangon ang asawa nga giilang si Aileen Tuna, hamtong, ug mikuha ug blade, dayon gisugdan ug hiwa ang iyang pulso, dayon gisunog ang anak.
Nakamata matud pa ang iyang bana gumikan sa hilak sa bata nga nagping-it sa kasakit, hinungdan nga paspas silang gidala sa Dr. Jorge P. Royeca Hospital.
Gilayong natabang ang mag-inahan ug kasamtangan nang anaa sa luwas nga kahimtang.
Ginasuta pa ang rason nganong nahimo sa inahan ang sa ingon, sa iyang kaugalingon ug sa anak.
