GENSAN – Sakit matud pa ang buot sa pamilya Benarao tungod sa nadangatan sa mahal nila sa kinabuhi nga si Veronica Benarao, nga una nang na-comatose didto sa Saudi Arabia.
Sa pakighinabi sa Bombo Radyo, gibutyag sa bana ni Veronica nga si Toto Benarao, human matud pa nila nadawat ang taho nga nakabsan na sa kinabuhi ang iyang asawa.
Apan base sa ilang nasayran, giundang na matud pa ang paghatag ug tambal sa iyang misis, human matud pa gideklarang brain dead.
Sumala pa nga kon sila lang unta ang pangutan-on, mas maayo unta nga gipadayon gihapon ang life-support sa iyang asawa hangtod nga dili pa hingpit nga patay.
Ug usa sa nakita nilang rason gumikan walay kabanay nga personal nga nag-atiman ug nagdesisyon didto sa kiliran sa iyang asawa.
Kahinumduman nga na-comatose si Benarao human matud pa nahagbong sa hagdanan, kung asa gibasol pa ang usa niya ka kauban nga OFW, apan napamatud-an nga walay kamatuuran ang alegasyon ug nasayran nga giatake kini sa hypertension nga maoy hinungdan sa iyang pagkahagbong.
