GENSAN – Wala na kapalag pa ang usa ka illegal recruiter dihang giaresto sa mga personahe sa NBI, samtang ginadawat ang bayad gikan sa iyang biktima nga gapatabang kaniya aron makatrabaho sa gawas sa nasud.
Gipahigayon ang entrapment operation ala-1:30 kagahapon sa hapon, sa usa ka coffee shop usa ka mall dinhi sa siyudad.
Kini human mireklamo ug nagpatabang sa mga otoridad ang manag-ig-agaw nga buot untang mag-abroad.
Sa pakighinabi sa Bombo radyo kang NBI-Sardo head Regner Pineza, gibutyag niini nga nakigkita ang usa sa mga biktima sa recruiter matud pa nga si Mary Jane Nadela, taga-Brgy Fatima, kanhing OFW gikan sa Kuwait, nga nagkanayon matud pa nga may kaila nga pwedeng makatabang sa pagrecruit.
Dihang gitunol ang sobre sa salapi wala gilayon kini gidawat sa suspek.
Apan dihang gikuha na ni Nadela ang sobre ug giihap ang unod nini, didto na sa miresponsde ang mga operatiba ug giaresto ang nahisgutan.
Gihingusgan ni Nadela nga ang mga biktima ang maoy miduol kaniya aron mapadali ang paggawas nila sa nasud.
Apan matud sa mga biktima, kapila na sila gihuthutan ni Nadel ug salapi.
Matud sa usa sa mga biktima nga si Jenny, una na siyang napangayuan ni Nadela ug 32,000 ug nangayo na usab ug dugang P10,000.
Apan dihang gisuta sa mga operatiba, nasuta nga dili ligal ug rehistrado nga recruiter si Nadela.
Giandam na ang kasong Estafa batok sa nahisgutang illegal recruiter.
