GENSAN – Mukabat sa tres milyones pesos ang pasiunang kantidad ga gigahin sa lokal nga panggamhanan alang sa pagpaayo sa atop sa Central Public Market.
Kini ang gibutyag sa Bombo Radyo ni Benjamin Sagrado, maintenance supervisor sa merkado publiko, isip aksyon sa reklamo sa mga stall owners nga guba-guba na ug gatulo ang atop kon gaulan.
Ug gani, gilaumang masugdan na ning semanaha ag pagbakbak sa kaarang atop sa palengke aron masugdan na ang repair.
Samtang, gitambagan ang mga stall owners hilabi na sa may bahin sa Phase A, nga magbutang una ug trapal isip temporaryong atop, ug isip proteksyon usab sa mga tipaka samtang ginahimo ang repair.
Matud pa ni Sagrado nga gibanabanaang mukabat sa P12 milyon ang kinatibuk-ang kantidad nga gikinahanglan aron hingpit nga mapaayo ang tibuok nga atop sa palengke.
Samtang, gawas sa pagpaayo sa atop, daghan matud pa ug nakalinya nga proyekto ug pagpalambo alang sa Central Public Market, sama na lamang sa pagbutang ug ramp alang sa mga PWDs ug senior citizens, lakip na ang pagtaod ug mga CCTV camera.
Kahibaluan nga plano karon sa lokal nga panggamhanan nga himuong “mallengke” ang naasoy’ng merkado publiko.
