GENERAL SANTOS CITY – Giangkon ni Dionesio Hectin ang Provincial manager sa NFA Gensan-Sarangani nga gawas sa bag-ong distribution scheme nga gipatuman, wala silay laing paagi aron mapun-an ang nagkakulang nga stock sa NFA rice nga nabilin karon sa ilang bodega.
Matud pa niini, dili sila makapamalit ug palay gikan sa mga mag-uuma tungod ang buying price sa NFA anaa lang sa P17/ kilo nga dili maka-apas sa buying price sa mga rice traders.
Sa iyang pamahayag nga diili basta-basta makapataas diretso og presyo sa pagpalit og palay tungod kinahanglan pa kining aprobahan sa NFA Council.
Kamatuoran, may rekomendasyon na kaniadto nga patas-an sa P20 kada kilo ang buying price sa palay nga gika sa mag-uuma apan wala makalusot.
Kung ugaling usab nga magpataas sila og P20/kilo sa pagpalit ug palay, ang himuon sa mga rice traders mao ang pagpataas usab sa ilang buying price.
Ug natural lamang usab nga didto sa mga mga rice traders nga mahal ang presyo sa pagpalit sa ilang palay.
Una niini, gibutyag ni Hectin nga gikulang na ang stock sa NFA rice sa ilang bodega hinungdan nga gibanabanaan nga mulungtad na lamang ug tulo ka semana ang pagbaligya ug NFA rice sa palengke.
Gani, 12 na lang gikan sa 135 NFA accredited outlet ang gabaligya karon ug bugas gikan sa ilang buhatan.
Kini ang ginahimo sa buhatan samtang gapaabut sa imported rice sa bulan sa Hunyo.
Samtang, nagpahimangno karon ang Gensan Consumer Welfare Council sa publiko batuk ngadto sa mga gapanglinla sa ubang mga tawo kalabot sa bugas.
Matud pa ni Baby Rodriguez, aduna silay nadawat nga report nga adunay gabaligya ug bugas sa kantidad nga P1800 ang matag sako.
Gibutyag niini, ang modus nga muadto sa mga barangay ang mga gapangilad og dayun kung makumbinsi ang ilang baligyaan ug bugas dungan sa pagkuha na sa bayad, magpakaaron-ingnon nga kuhaon matud pa ang bugas sa sakyanan apan dili na mubalik.
Gawas niini, sa palengke usab adunay mga gibaligya nga sinako sa bugas nga kulang sa timbang.
Gibutyag ni Rodriguez nga angayang ang usa ka sako ang anaa sa 50 kilos ang unod apan may gibaligya nga anaa sa 48 o 47 lang ang kilo matag sako.
Giangkon sa maong opsiyal nga adunay laing mga gabaligya usab nga ensakto sa 50 ka kilo ang usa ka sako sa bugas.
