GENERAL SANTOS CITY – Malaumon si Celso Tingson, ang Physical Education Sports Supervisor sa DepEd-GenSan nga mabawi sa delegasyon sa GenSan ang kampeonato gikan sa South Cotabato.
Sa pakighinabi sa Bombo Radyo, gibutyag sa nasampit nga dako ang tiyansa sa dakbayan nga mag-champion tungod daghang gold medals na pagkakaron ang nasungkit sa mga atleta nga misabak sa mga individual sports.
Basi sa medal tally, nanguna ang South Cotabato nga adunay 22 gold, 23 silver og 26 bronze, anaa sa ikaduhang pwesto ang Gensan nga adunay 17 gold, 12 silver og 18 bronze medal; Rank-4 ang Koronadal; Rank-5 Cotabato Province; parehong anaa sa Rank-6 ang Kidapawan City ug Sarangani Province; anaa sa ikapito nga pwesto ang Sultan Kudarat ug walay nakuha nga medalya ang Cotabato City.
Gisiguro ni Tingson sa mga ginikanan nga anaa sa maayong kamot ang ilang mga anak nga nahimong kabahin sa delegasyon sa Gensan sa SRAA Meet.
Sa pamahayag sa nasampit, walay problema sa ilang mga billeting area ug aduna sila luwas nga tubig nga mainom ang mga atleta.
Gikadugang pa niini nga adlaw-gabie adunay ga-roving alang sa seguridad sa tanan og pagbantay sa mga butang sa mga atleta.
Kahibaluan, ang GenSan ang nag-grand slam na sa SRAA Meet human ang tulo ka sunod-sunod nga kampeonato gikan niadtong 2013 hangtud 2015.
Apan niadtong 2016, nailog sa South Cotabato ang kampeonato hangtud 2017.
