GENERAL SANTOS CITY –Nagpasalamat ang mga residente sa Octavio Village, Prk Mabinuligon, Brgy Cannery, Polomolok, South Cotabato, human nga wala mibusikad ang usa ka granada nga nakaplagan atubangan sa usa ka bakeshop sa lugar.
Matud ni Prk Chairman Danny Arcana, nakaplagan ang naasoy’ng explosibo bandang alas-6:45 kaganihang buntag sa usa ka bata ug gilayong gisumbong kanila, hinungdan nga nanawag gilayon sila ug pulis aron kini marespondehan.
Samtang gibutangan una ug ligid sa mga residente aron ma-secure ug gikordon ang lugar samtang wala pa ang mga otoridad, ug nanirado una ang mga establisyimento sa palibot.
Matud sa usa ka residente nga nakahinabi sa Bombo Radyo, hilabihan ang ilang kahadlok dihang nasayran ang pagkakaplag sa nahisgutang granada, nga kon ugaling mibusikad kini, siguradong naapil gayud sila.
Nasayran nga usa kadto ka F1 Russian grenade, ug wala nay safety pin.
Gikabutyag nga walay nakamatikod kon kinsa ang nagbutang o naglabay niini sa lugar.
Sa karon nagpadayon ang imbestigasyon sa mga sakop sa Polomolok Municipal Police Station katambayayong ang Explosive Ordnance Disposal (EOD) kalabot sa naasoy’ng granada.
