GENERAL SANTOS CITY – Usa ang kritikal, samtang samaron usab ang lain pang upat ka tawo human gibanggaan sa usa ka mini dumptruck ang nakaparada nga motorsiklo sa kilid sa Engr. Morrow Avenue, Brgy Sinawal ning dakbayan.
Nahitabo kini pasado alas-2:00 sa hapon, kung asa base sa inisyal nga imbestigasyon, paspas ang dagan sa dumptruck nga gikan sa direction sa GenSan Airport, dihang kalit na lamang kining mi-ekis-ekis ang dagan ug midiretso sa motorsiklo sakay ang nagpangalan ug Clifford Neil, apuhan niya nga si Rosario Heli, ug uyuan niya nga si Anthony Dedicatoria nga maoy driver.
Nasayran nga pauli na unta ang mag-apuhan sa Surigao ug gihatod sa iyang uyuan sa kanto sa nasampit nga dalan. Nagpahulay lamang matud pa sila sa kilid sa dalan gumikan sa ulan.
Swerteng nakadagan si Neil, apan wala na nakalikay ang iyang apuhan ug uyuan nga pulos nakaangkon ug samad ug gidalan sa balay-tambalanan.
Samtang nangabuak ang samin sa truck ug nakaangkon usab ug samad sa lawas ang mga sakay niini lakip ang driver.
Giimbestigahan na sa mga otoridad ang nasampit nga disgrasya, samtang padayong nagpaalim sa tambalanan ang mga nasamdan.
Kahibaluan nga kaniadtong Dominggo sa kaadlawon, usa usab ang patay human ang banggaanay sa 10-wheeler truck ug motorsiklo gihapon sa Brgy Lagao, kung asa nagkaaregluhay na ang kampo sa namatay ug tag-iya ug driver sa truck.
