GENERAL SANTOS CITY – Giandam na sa kapulisan sa Tinagacan ning dakbayan, ang mga dokumento alang sa pagpasang-at ug kasong murder batok sa suspek nga mitigbas-patay sa 58-anyos nga biktima sa Prk 5 Tinagacan, miaging gabii.
Kini ag gibutyag sa Bombo Radyo ni Police Senior Inspector Roel Abehiro sa Tinagacan Police Station, kung asa ang biktima giilang si Luis Ramos Alyas Loloy, residente sa nasampit nga lugar.
Kahibaluan nga gilayong nagpahigayon ug hot pursuit operation ang kapulisan batok sa nahisgutang menor de edad, apan pakyas silang masikop kini.
Base sa insiyal nga imbestigasyon, gituuhang nag-ugat ang pagpanigbas sa kanunay matud pang pagpanunlog kaniadto sa biktima ngadto sa suspek.
Nakadawat usab matud pa ang edaran ug bahad sa kinabuhi gikan sa wala mailhing tawo.
Apan hugtanong gipanghimakak sa mga kabanay sa nahisgutang 16-anyos, ang gikaingong kalambigitan niini sa krimen.
Hinuon, gikabutyag nga wala na kini nagpakita sa lugar sukad nahitabo ang insidente.
Apan andam matud pa sila nga ipaatubang kini sa mga otoridad oras nga mubalik kini kanila, aron magpaklaro.
