GENERAL SANTOS CITY – Mukabat sa 25 ka mga motorbanca ang gipangtunol nilang Department of Agriculture Sec. Manny Piñol kauban si Sen. Manny Pacquiao sa mga mananagat sa Kiamba, Sarangani.
Dungan kini sa pagbisita sa duruha sa nahisgutang munisipyo kagahapong adlawa, alang sa pag-turnover sa P15.5 milyon nga proyekto alang sa mga mag-uuma ug mangingisda sa lugar, ug sa bag-o nilang fish port.
Nagkantidad ug P5.5 milyon ang gihatag alang sa abaca expansion project, kung asa makabenepisyo ang usa ka kooperatiba sa mga gatanum ug abaca.
Samtang P10 milyon ang gigahin alang sa production loan easy access kon (PLEA), kung asa pwedeng muutang ang mga mag-uuma ug mangingisda nga walay kolateral ug may 6% interest lamang matag tuig.
Samtang, alang sa bag-o nilang fishport complex, gikinahanglan na lamang matud pa ug ordinansa gikan sa konseho aron maka-operate na, ug nagkinahanglan usab ug water-breaker, hilabi na nga nag-atubang sa Celebes Sea nga kusog ang water pressure, hilabi na kon may mga weather conditions.
Gumikan niini, mapasalamaton pag-ayo sa DA ug kang Sen. Pacquiao, ang mga mag-uuma ug mananagat sa Kiamba, lakip na sa lokal nga panggamhanan nila.
