GENERAL SANTOS CITY – Malampusong nakapangural silang Brgy Dadiangas South Kag. Rock Garay ug ubang mga nanag-iya ug luna sa Brgy Labangal, duol sa ginaangkon ug gi-okupa ni Boy Olarte, kagahapong adlawa.
Kini human nga nahasol ug nabalaka usab ang mga nanag-iya ug luna sa lugar, tungod sa kasamok nga ginahimo sa kampo ni Olarte.
Usa pa sa gikasuko ni Garay ang nadunggan matud pa niini mismo nga ang usa sa mga sakop ni Olarte nga nagkanayon nga pamusilon ang kinsa mang pulis o militar nga musulod ug mutabang sa mga land owner. Hinungdan nga plano niya kining kasuhan.
Dungan niini, gihagit ni Garay ang kampo sa mga squatters nga dili gayud sulayan nga padak-on ang kagubot nga ilang gidala dinhi sa siyudad, gumikan nagkahiusa na sila sa uban pang mga legal nga land owner, nga hingusgan ang ilang katungod sa ilang mga luna, pinaagi sa pagbutang ug koral ug pagbutang ug gwardiya.
Samtang,gisaysay sa mga residente sa bahin sa Brgy Labangal, ang ilang tumang kalisang sa gakahitabo nga kagubot sa ilang lugar, gumikan sa ginahimo sa kampo ni Boy Olarte sa mga ginaangkon nila nga luna.
Matud ni Ginang Teresita, usa sa mga residente, nagtukaw matud pa sila kaniadtong natigayon ang pagbuto-buto sa armas miaging semana, kung asa nagdinaganay ang mga tawo.
Nadunggan usab matud nila mismo nga gibutyag sa usa sa mga sakop ni Olarte nga ipakuha ang lugar sulod sa 48 oras.
Nagpatabang matud pa sila sa ilang purok chairman, ug may miabot matud pa nga mga naka-uniporme nga mga pulis human sa buto-buto, nga nasuko ug gikwestiyon matud pa ang pag-apil-apil ni Prk Chairman Tsunami Reman.
Hinungdan nga nagduda hinuon sila nga daw sa may ginapaboran sa mga otoridad.
Dungan niini, sa pakighinabi sa Bombo Radyo, gikondena sa nasampit nga purok chairman ang ginahimo sa kampo ni Boy Olarte.
Gihingusgan niini nga ilahang panalipdan ang mga residente sa lugar hilabi na sa ilang purok, batok sa mga squatters.
